Series de vogais I

Para aprender a distinguir entre abertas e fechadas

5 letras para 7 vogais

En galego temos 7 vogais, mais só usamos 5 letras (a, e, i, o, u) para representalas.

As vogais son o a, o e aberto, o e fechado, o i, o o aberto, o o fechado e o u.

Isto quere dicir que aínda que na escrita teñamos un e, dependendo da palabra, unhas veces teremos que pronunciar un e aberto e outras, un e fechado. O mesmo acontece coa letra o: unhas veces ese o será aberto e outras, fechado.

Eu non distingo entre abertas e fechadas, soa todo igual!

Non, non é verdade. Aprender a diferencialas non é difícil, só é necesario un pouco de práctica.

Como ao longo de todo o ano, imos facer moitos exercicios, garántoche que acabarás por distinguilas. Non ten segredo ningún, só hai que ouvir e prestar atención a como son pronunciadas. Para practicares, podes usar o Dicionario de pronuncia galega

Pouco a pouco iraste familiarizando cos sons e serás capaz de distinguilas e de producilas. O obxectivo final deste tipo de exercicios é pronuncialas correctamente cando falamos.