Ben falado! Os posesivos meu, teu, seu

Ben falado! De meu, de teu, de seu

Significados: de meu, de teu, de seu

1. Indicar que teño a propiedade exclusiva de algo. Úsase con bens materiais que podes comprar, vender, ter, perder ou transmitir a outros:

• Tendes un apartamento de voso?
• Ese libro é de teu ou emprestároncho.
• Aínda que nacín nela, a miña casa non é de meu.
• Non ten casa de seu, por iso aínda vive cos pais.
• Como non ten coche de seu, vai cun compañeiro ao traballo.
• Non teñen terras de seu, traballan as dos outros.

As expresións de meu, de teu, de seu, de noso, de voso e de seu empréganse para expresar pertenza exclusiva:

• Tantos anos de traballo e non tendes nada de voso.

2. Indicar que alguén posúe algo en por si, por propia natureza, como característica ou propiedade da súa maneira de ser.

• Como é lista de seu, entende todo á primeira.
• Podes pedirlle axuda cando precises, Ana é boa de seu.
• O coala é preguizoso de seu.

Estas formas poden indicar que unha característica é propia da natureza dunha persoa.

• Seguro que non espera nada a cambio. É que é boíño de seu.

3. Indicar que algo sucede por si mesmo, sen participación externa:

• O cadro caeu de seu, non lle tocou ninguén.
• É tan forte que curou de seu, sen tomar medicación ningunha.
• Non apaguei a TV, parou de seu. Debeu marchar a corrente.

4. Indicar relación de parentesco (No norte de Galicia e mais no leste, entre Lugo e Asturias, e sobre todo entre Lugo e León)

• Unha tía de noso.
• Un fillo de meu.

Ben falado! Cadanseu, cadansúa, cadanseus, cadansúas

(04:16 min)