O Entroido

O que é o Entroido?

É unha festa popular de orixe pagá. Nos seus comezos, formaría parte dos ritos vinculados ao inverno, concretamente á fin do frío e á chegada da primavera e do tempo de sementar e, segundo isto, a finalidade das máscaras sería a de espantar os malos espíritos das colleitas.

O Entroido tradicional foi concibido como a celebración do mundo ao revés, o escenario de todo o que está mal visto facer o resto do ano. Antigamente, o sentido do Entroido entendíase fronte á Coresma, que no cristianismo é o tempo da penitencia, da pureza e de pedir perdón polos pecados. Este xeito de concibir o Entroido xa non ten tanto peso na actualidade.

Esta festa recibe moitos nomes ao longo de todo o territorio galego, por exemplo, entroido, antroido, entroiro, antroiro, entruido, entrudio, entrudo (lit.). A forma máis antiga é entroido que xa aparece documentada en 1251 e que foi a que a Real Academia Galega escolleu como estándar. Procede do latín INTROITO “entrada na Coresma”

Alén de entroido tamén temos a forma carnaval. Carnaval é unha palabra de orixe italiana, carnevale ("levar a carne"), que pasou logo a outros idiomas europeos como o francés, o castelán ou mesmo o portugués (desde mediados do século XVI).

Os personaxes do Entroido galego

O máis típico do Entroido é andar de carauta posta chocallando e trangallando, é dicir, correndo o Entroido, procurando que non che caian uns lategazos ou unha presa de formigas.

Con tanta mascarada non resulta doado sabermos quen é quen polo que imos darlle un repaso a algúns dos personaxes máis recoñecidos do noso Entroido:

Unha ducia de personaxes do Entroido, artigo de David Lombao publicado no xornal dixital Praza.

Setestrelo do Portal das palabras: Sete personaxes do Entroido