Contraccións (1)

As formas do artigo determinado (o, a, os, as) contraen coas preposicións a, con, de, en e por en galego.

Exercicio 1

Contrae a preposición que aparece entre parénteses co artigo determinado:

Exemplo: Comemos polbo á (a) feira e churrasco.

1. Fun ao (a) supermercado, á (a) peixaría e á (a) panadaría.
2. O irmán máis vello estuda no (en) seu cuarto e o pequeno, na (en) sala de estar.
3. Tatexaba máis do normal polos (por) nervios.
4. Se volves cedo do (de) adestramento, iremos ao (a) cinema.
5. Estamos a agardar polo (por) tren que vén da (de) Coruña.
6. Quero saír á (a) rúa brincar coas (con) miñas amigas.
7. Meteu as mans nos (en) petos e púxose a asubiar.
8. Espirro moito na (en) primavera porque teño alerxia ao (a) pole.
9. Lévome ben cos (con) meus pais e coas (con) miñas irmás.
10. Van expulsar a Antón do (de) instituto polo (por) seu mal comportamento.
11. Rabuñou as pernas todas nas (en) silvas.
12. Fun pasear á (a) beira do río co (con) meu can.
13. Caeu polas (por) escaleiras e partiu un óso da (de) perna.
14. Acordo ás (a) 7 da mañá para ir ao (a) traballo.
15. As pingas de suor escorríanlle pola (por) cara.
16. Senta na (en) cadeira e escoita con atención.
17. Abre coa (con) túa chave, eu esquecín a miña.
18. Non hai quen entenda a letra dos (de) apuntamentos da (de) miña compañeira.
19. Subiu moito o prezo das (de) cereixas.
20. Deixounos a todos coa (con) boca aberta.

Corrixe as respostas

E o que acontece cos artigos dos topónimos?

Contraen tamén coas preposicións? Como será: Vivo en A Coruña ou vivo na Coruña?

Hai topónimos que levan necesariamente artigo (A Coruña, O Carballiño, A Estrada), mentres que outros se usan sempre sen el (Negreira, Vigo, Lugo).

Como moi ben explica Esther Estévez, os artigos que acompañan algúns destes nomes de lugar compórtanse coma o resto dos artigos no que se refire ás contraccións. De acordo con isto, cando van precedidos dunha preposición coa que contraen (a, con, de, en ou por), temos que facer a contracción igualmente: vivo na Coruña, pasei polo Carballiño, vén da Estrada etc.

Ficou claro? Aínda non? Pois aquí che deixo unha segunda explicación de Esther, neste caso para un usuario de Tiktok, sobre as contraccións cos topónimos. Olla o vídeo e non peques máis en galego!

Exercicio 2

Realiza a contracción cando for preciso:

1. Antón vai na (en) Guarda e non volve até a noite.

2. Este ano quería ir á festa do queixo de (de) Arzúa.

3. Pasei a fin de semana na casa dos meus pais en (en) Ribeira.

4. Eles veranean no (en) Grove desde hai moitos anos.

5. Nacín en (en) Ferrol, mais agora vivo nas (en) Pontes de García Rodríguez.

6. A miña nai é da (de) Pobra do Caramiñal.

7. Vivín varios anos no (en) Porriño.

   Corrixe as respostas