Bes e uves

En galego é complicado sabermos cando unha palabra se escribe con b e cando con v, porque a pronunciamos sempre da mesma maneira.

Non lles sucede así aos falantes doutras linguas románicas como portugueses, franceses ou italianos. Mais non é porque eles sexan máis espelidos ca nós, 🙅‍♀️.

Para eles é moito máis fácil, dado que pronuncian de modo diferente o b e o v. De acordo con isto:

• Escriben b cando pronuncian o mesmo son ca nós, e que nós escribimos unhas veces con b e outras con v.
• Escriben v cando pronuncian un son parecido ao do f, mais sonoro.

Queres saber por que acontece isto? Atento ao vídeo:

Como podes ver, acertarmos se unha palabra leva b ou v non é tan simple e require un certo adestramento pola nosa parte.

Recursos

Aínda ben que na rede hai moitos sitios con consellos e actividades para mellorarmos a nosa competencia nesta cuestión.

Primeiro comeza por veres este vídeo do #DígochoEu:

E despois podes continuar o teu adestramento no site: Ortografía: O uso do b e do v

Exercicios

Tarefa 1

Escolle entre os seguintes pares de palabras a que encaixe mellor en cada caso:

Abalar - avalar

• Seica quebrou en Muxía a pedra de abalar
• Téñenme que avalar meus pais para que me dean o crédito.

Balor - valor

• Cómpre moito valor para dar a cara como o fixo el.
• Ese pan ten balor por cima.

Bola - vola

• Díxonos que vola trouxera ela.
• Vai á panadaría e merca unha bola pequena.

Bela - vela

• É a canción de amor máis bela que escoitei.
• O galeón é un barco antigo de vela

Botar - votar

• Xa sei a quen vou votar nestas eleccións.
• Quéreno botar do equipo.

Rebelar - revelar

• Vouche revelar un segredo.
• Non estou de acordo coa decisión, eu voume rebelar

Bou - vou

• Se vou a Bueu nun bou, vou
• Se non vou nun bou, non vou

Verifica as respostas

Tarefa 2

2 xogos do Portal da palabras > Dimo con letras

B-V Dúas letras para un único son

Be e be-ese Substantivo ou sustantivo

Tarefa 3

Sabías que hai un canción moi coñecida en que se brinca coas semellanzas fonéticas entre dúas palabras, unha con be e outra con uve. O título desta música é Vou a Bueu. Ouve a versión que fixo dela Andrés do Barro:

Desde hai pouco podemos gozar tamén destoutra versión da canción realizada por Esther Estévez e mais as Tanxugueiras para o TikTok.

En Bueu teñen moi claro como hai que ir, mais como irías ti. Sabes o que é un bou con b?