Aprende a pronunciar con xeito o x
Lista de palabras en que a pronuncia do x é [ks]
Hoxe imos debruzarnos sobre 10 palabras que é moi habitual ouvirmos cunha pronuncia errada. A incorrección consiste en pronunciarmos o x como en queixa ou en lixo, cando o son que deberiamos producir é o mesmo que en tórax ou en experto.
Lémbrate!
A pronuncia do x de todas estas palabras mantense igual nas derivadas.
- anexar
Temos [ks] no verbo anexar, logo nos dous participios: anexo e anexado, tamén.
- circunflexo
O circunflexo é un tipo de acento (^). En portugués úsase para marcar as vogais fechadas. Ex.: pôr.
A pronuncia do x desta palabra é como a de nexo.
- complexo
Complexo ten [ks], e tamén complexidade, acomplexar e todos os complexos resultantes deste verbo: de culpa, de Edipo, de Electra, de inferioridade, de superioridade...
- crucifixo
O xe de crucifixo e de crucifixión pronúnciase como o de flexión.
- paradoxo
Un paradoxo é unha contradición aparente.
A pronuncia da terminación desta palabra é igual á de heterodoxo. Neste caso, non hai paradoxo ningún, porque paradoxal e paradoxalmente tamén se pronuncian con [ks].
- perplexo
😯
Todos fican perplexos ao saberen que a pronuncia deste x é [ks]. Pois é, e o mesmo se aplica a perplexidade.
- prefixo
Pronúnciase con [ks] prefixo e toda a familia: prefixación, prefixar, sufixo, sufixar, sufixal, sufixación, infixo, interfixo...
- prolixo
O contrario de conciso é prolixo con [ks]. Aínda que o adxectivo pode aplicarse tanto a persoas (aquelas con tendencia á digresión) como a cousas (demasiado longas e extensas), repara neste pormenor: unha escritora con moita obra publicada non é *prolixa, senón prolífica.
- reflexo
O son [ks] está presente en reflexo, retroflexo e reflexivo. O verbo do cal proveñen non é *reflexar, non, é reflectir.
- saxón
O nome deste pobo xermánico ten [ks], por tanto, tamén o teñen saxoa, anglosaxón, anglosaxoa, baixosaxón e baixosaxoa.